其實成個過程我係完全唔知佢做緊乜, 唔會有o的刀刀叉叉既聲啦, 只係覺得個肚仔好似俾人掂下掂下咁.......怪怪的~~~ 
其間只係覺得越黎越眼訓.......
然後就聽到巫e生話, 見到喇...... 跟住麻醉師就好大力咁o係我個頭既位置順勢好大利咁推呀推, 推呀推....... 我梗係知佢推乜啦, 推心肝出黎丫麻, 巫e生一早講左架喇......
點知...... 推左幾下大大力之後, 都好似唔多成功.....巫e生仲話: 洗唔洗咁高呀..... 
然後呢..... 就聽到佢地話要用個夾夾.... 拑我心肝出黎喇..... 
嗚嗚...... 心肝您曳呀, 係要人地用工具先出到黎..... 
然後巫e生就話: 出左黎喇..... 然後同姑娘講: 交俾你喇....
我跟住聽到一陣bb聲..... 繼而聽到姑娘應該用條管吸bb既分泌物.... 我仲心諗: 心肝, 做咩您喊得咁細聲, 您係咪有事.........?! 點知好快您就"wa"一聲咁喊左出黎...... o個一刻我真係好感動.... 仲喊左出黎添...... 終於, 辛辛苦苦經營十個月, 您出世喇......!!!!!
跟住之後巫e生應該係幫心肝抽臍帶血啦, 之後就聯針咁囉...... 一路聯針, 姑娘就幫心肝您清理好o的污髒野先..... 跟住包好毛巾就放o係我身邊..... 打開毛巾問我係仔定女: 係女仔!!! 姑娘跟住就話: 出世時間係10點21分!!!!
您本來喊緊架, 跟住一放埋黎我就同您講: 靖天您好啊, 我係您媽咪啊..... 唔好喊啦....您認唔認得我把聲啊...... ???
我講完之後您真係收左聲, 仲眼仔碌碌咁望住我...... 我仲話: 靖天您對眼好大好靚, 您好靚女啊.....!!! 
跟住姑娘就幫我地影相喇..... 巫e生好好人啊, 叫姑娘同我影多幾張, 跟住燒返隻碟俾我.... 我梗係話好啦!! 多謝你呀, 巫醫生!!!! 
睇下...... 您真係好靚女架...... 一出世就眼仔大大咁..... 好想抱實您黎錫啊!!!!
跟住心肝您就俾姑娘抱走左..... 因為要上返bb房度裝身喇..... 我呢, 咪繼續俾巫e生聯呀聯, 聯呀聯囉.... 聯左大約半個鐘..... 我就搞掂喇!~~~ 但o個陣已經好攰好眼訓.....可能係o的麻醉藥啦~~~~
跟住巫e生就話, 手術完成架喇........ 恭喜你....... (多謝~~~) 哈哈~~~~
之後我推返出手術室, o係觀察間抖左陣..... 話睇下我有無唔舒服啊.... 但其間最唔舒服係我個身不停咁打冷顫...... 又唔係好凍, 但就不停咁震...... 原來做半身麻醉, 係會咁架喎....
等左半個鐘度, 就推返我上病房喇......
老公見到我, 見佢眼濕濕咁.....
. 我又眼濕濕...... 佢仲錫左我一啖, 同我講左句: 多謝你, 辛苦你喇, 老婆....... 真係甜到入心.... 嘻嘻!!! 
之後, 就開始我手術後既第一日住院生活喇.........
(續.....)
